Eventyrleg i Bondalselva

4,5 tonn fordelt på om lag 900 laksar er fiska opp av Bondalselva i Ørsta i år. - Eg har aldri opplevd maken, seier leiar Bjørn Urkegjerde i Sunnmøre elveeigarlag

- Folk meinte det var fantastisk då det midt på 1970-talet vart fiske 70-80 storlaksar. I år har det vore fiska over 400 storlaksar med ei gjennomsnittsvekt på rundt fem kilo. Det er mest ikkje tru å tru, seier Urkegjerde. Då elva vart stengt for fisk ved utgangen av juli har det vore drege på land 480 pjakk, fisk under tre kilo, og 434 storlaks. Fisket starta 15. juni. Samla fangst er på om lag 4500 kilo, noko som er to tonn meir enn i fjor. Den største fisken som er teken i år er på 12 kilo, men Urkegjerde (53) har observert fiskar på minst 15 kilo. Han slengde si første fluge i Bondalselva som seksåring og er ein av dei store veteranane i elva. I år har han drege på land 13 laks og 15 pjakk.

Åtvarar mot oppdrettsfisk

Urkegjerde seier mange år med kultiveringsarbeid er hovudårsaka til at det er fiska så mykje storlaks.

- Men lakselusa spelar dessverre inn. Vi har kultivert kilotung pjakk, men eg trur storlaksen er meir motstandsdyktig mot lakselus, seier Urkegjerde som åtvarar mot å fylle fjordane med oppdrettslaks.

- Lakselusa smittar frå oppdrettsanlegg og rømd oppdrettsfisk. For mykje oppdrettslaks i fjordane kan få store negative konsekvensar, ikkje berre for Bondalselva, men for lakseelvar over heile landet. Meldingar tyder på at fisket i dei andre elvane på Sunnmøre er generelt dårlegare enn i fjor. Mykje tyder på at dette kan ha samanheng med smitte av lakselus, seier Urkegjerde. Han etterlyser offentlege midlar for å kartleggje kor myke smolt som er smitta av lakselus.

Av Bård Seim, Sunnmørsposten, 03.08.01